काठमाडौं — नेपाली सेनाको टोली शुक्रबार साँझ काठमाडौंका विभिन्न क्षेत्रमा सडकमा परिचालित भएको छ। जिल्ला प्रशासन कार्यालयले कर्फ्यु लगाउने निर्णय गरेपछि स्थिति नियन्त्रणमा लिन सेनाको उपस्थिति देखिएको हो।
तीनकुने क्षेत्रमा भेला भएका राजावादी प्रदर्शनकारीहरूले शुक्रबार दिउँसोबाट उग्र प्रदर्शन गरेपछि अवस्था तनावग्रस्त बनेको थियो। प्रदर्शनकारीहरूले राजसंस्थाको पुनःस्थापनाको माग गर्दै नाराबाजी गरेका थिए। केही स्थानमा झडप समेत भएको खबर छ। सुरक्षाकर्मीले प्रदर्शनकारीहरूलाई तितरबितर गर्न लाठीचार्ज र अश्रुग्यास प्रहार गरेका थिए।
काठमाडौंका विभिन्न क्षेत्र, विशेष गरी नयाँ बानेश्वर, तीनकुने, र रत्नपार्क क्षेत्रमा राजावादी प्रदर्शनकारीहरूको उपस्थिति बाक्लो थियो। उनीहरूले सरकार विरोधी नाराहरू लगाउँदै सडक अवरुद्ध गरेका थिए।
स्थिति झन् जटिल बन्ने संकेत देखिएपछि जिल्ला प्रशासन कार्यालय, काठमाडौंले अनिश्चितकालीन कर्फ्यु आदेश जारी गर्यो। प्रशासनले सार्वजनिक सूचना जारी गर्दै सर्वसाधारणलाई घरबाट ननिस्कन आग्रह गरेको छ।
यसअघि, उपत्यकामा विभिन्न समूहहरूले सडक अवरुद्ध गर्दै विरोध प्रदर्शन गरिरहेका थिए। तर, राजावादी समूहको प्रदर्शन हिंसात्मक बनेपछि प्रशासनले सुरक्षा व्यवस्था कडा पार्ने निर्णय गर्यो।
काठमाडौं उपत्यकामा अहिले ठूलो संख्यामा सुरक्षाकर्मी परिचालित छन्। प्रहरीले संवेदनशील क्षेत्रमा गस्ती बढाएको छ भने नेपाली सेनालाई पनि तयारी अवस्थामा राखिएको छ। प्रशासनले कुनै पनि अप्रिय घटना हुन नदिनका लागि कडा निगरानी राख्ने जनाएको छ।
